ಶೀರ್ಷಿಕೆ – ಸೌಂದರ್ಯ ಮಹಿಮೆ
ಏಳಿಸುವುದೊಂದು ಹೊರಸುಳಿವೆನ್ನ ಹೃದಯದಲಿ ಗಾಳಿಸುಂಟರೆಯನದು ಹರಣಗಳ ಕುಲುಕಿ ಬಾಳನಲ್ಲಾಡಿಪುದು ಬೇರಿಂದ ತುದಿಗೆ ಧೂಳದೊರಳೀ ಜನ್ಮ – ಮಂಕುತಿಮ್ಮ|| 439 ||
ಹೊರಗೆ ಹೊಳೆವೊಂದು ಹೊಳಪಿನ ಕಿರಣವೆನ್ನೆದೆಯೊ- ಳುರಿಯನೆಬ್ಬಿಸಿ ಹೊಗೆಯನೆರಚಿ ಕಂಗಳಿಗೆ ಕೆರಳಿಪುವು ಕರಣಗಳ, ಮರಳಿಪುದು ಹರಣಗಳ ಹೊರಮೋಹವೊಳದಾಹ – ಮಂಕುತಿಮ್ಮ|| 440 ||
ಇಂತು ಹೊರಗೊಳಗುಗಳು ಬೇರೆಲೋಕಗಳಲ್ಲ ಅಂತರಂಗದೊಳೂರಸಂತೆ ಸದ್ದಿಹುದು ಸಂತೆಯೊಳಮಂತರಂಗದ ಸದ್ದು ಕೇಳಿಪುದು ಸ್ವಾಂತದಿಕ್ಕೆಲಗಳವು – ಮಂಕುತಿಮ್ಮ|| 441 ||
ಸೊಗಸು ಬೇಡದ ನರಪ್ರಾಣಿಯೆಲ್ಲಿಹುದಯ್ಯ ಮಗುವೆ,ಮುದುಕನೆ,ಪುರಾಣಿಕ ಪುರೋಹಿತರೆ? ಜಗದ ಕಣ್ಣಿಣಿಕದೆಡೆ ಮುಕುರದೆದುರೊಳು ನಿಂತು ಮೊಗವ ತಿದ್ದುವರೆಲ್ಲ – ಮಂಕುತಿಮ್ಮ|| 442 |||
ತಿಂಗಳಾರರ ದುಡಿತ ಚೆಂಗುಲಾಬಿಯ ಬೆಳೆತ ಕಂಗೊಳಿಪುದದರ ಸಿರಿಯರೆಗಳಿಗೆಯಲರೊಳ್ ಪೊಂಗುವಾನಂದವದನನುಭವಿಸದವನ್ ಅಜನ ಹಂಗಿಪನೆ ಕೃಪಣತೆಗೆ? – ಮಂಕುತಿಮ್ಮ|| 443 ||
