ಶೀರ್ಷಿಕೆ – ಮಾನುಷ ತರ್ಕ
ಬರಿಯ ಬುದ್ಧಿವಿಮರ್ಶೆಗರಿದು ಜೀವನಸತ್ವ ಪರಿಶೋಧಿಸುವರಾರು ಬುದ್ಧಿಋಜುತೆಯನು? ಸ್ಫುರಿಸುವುದದೆಂದೊ ತಾನೇ ಮಿಂಚುಬಳ್ಳಿವೊಲು ಪರಸತ್ವ ಮನದೊಳಗೆ – ಮಂಕುತಿಮ್ಮ|| 539 ||
ನರವಿವೇಕವದೇನು ಬರಿಯ ಮಳೆನೀರಲ್ಲ ಕೆರೆಯ ನೀರ್ ಊರ ಮೈಸೋಂಕುಗಳ ಬೆರಕೆ ಧರೆಯ ರಸವಾಸನೆಗಳಾಗಸದ ನಿರ್ಮಲದ ವರವ ಕದಡಾಗಿಪುವು – ಮಂಕುತಿಮ್ಮ|| 540 ||
ಪ್ರಾಕ್ತನದ ವಾಸನೆಯೇ ಮನಕೆ ಮೊದಲಿನ ಮಂತ್ರಿ ಯುಕ್ತಿಗಳ ತನಗೊಪ್ಪುವಂತೆ ತಿರುಗಿಪುದು ಸೂಕ್ತವೆನಿಪುದು ಸಹಜರುಚಿ ತನ್ನ ತರ್ಕವನೆ ಗುಪ್ತದೊಳು ಕುಟಿಲವದು – ಮಂಕುತಿಮ್ಮ|| 541 ||
ಆಸೆ ಮಂಥರೆ, ನರವಿವೇಚನೆಯೆ ಕೈಕೇಯಿ ಬೀಸೆ ಮನದುಸಿರು ಮತಿದೀಪವಲೆಯುವುದು ವಾಸನೆಗಳನುಕೂಲ ಸತ್ಯತರ್ಕಕೆ ಶೂಲ ಶೋಷಿಸಾ ವಾಸನೆಯ – ಮಂಕುತಿಮ್ಮ|| 542 ||
ಭಾವದಾವೇಶದಿಂ ಮನವಶ್ವದಂತಿರಲಿ ಧೀವಿವೇಚನೆಯದಕೆ ದಕ್ಷರಾವುತನು ತೀವಿದೊಲವಿನ ದಂಪತಿಗಳಾಗೆ ಮನಬುದ್ಧಿ ಜೀವಿತವು ಜೈತ್ರಕಥೆ – ಮಂಕುತಿಮ್ಮ|| 543 ||
