ಶೀರ್ಷಿಕೆ – ಪ್ರಾಚೀನ-ಪ್ರಸಾದ
ಪ್ರಾರಬ್ಧದಲಿ ನಿನ್ನ ಪುಣ್ಯವಿನಿತಾನುಮಿರೆ ಸೇರೆ ಪಶ್ಚಾತ್ತಾಪ ಭಾರವದರೊಡನೆ ದಾರುಣದ ಕರ್ಮನಿಯತಿಯನಿನಿತು ಶಿಥಿಲಿಪುದು ಕಾರುಣ್ಯದಿಂ ದೈವ – ಮಂಕುತಿಮ್ಮ|| 509 ||
ನಿನ್ನೇಳುಬೀಳುಗಳು ನಿನ್ನ ಸೊಗ ಗೋಳುಗಳು ನಿನ್ನೊಬ್ಬನೋಸುಗವೆ ನಡೆವ ಯೋಜನೆಯೇಂ ಇನ್ನದೆನಿಬರ ಜೀವಪಾಕವದರಿಂದಹುದೊ ಛನ್ನವಾ ಋಣಮಾರ್ಗ – ಮಂಕುತಿಮ್ಮ|| 510 ||
ನರಕ ತಪ್ಪಿತು ಧರ್ಮಜಂಗೆ,ದಿಟ, ಆದೊಡೇಂ ನರಕ ದರ್ಶನದುಃಖ ತಪ್ಪದಾಯಿತಲ? ದುರಿತತರುವಾರು ನೆಟ್ಟುದೊ, ನಿನಗುಮುಂಟು ಫಲ ಚಿರಋಣದ ಲೆಕ್ಕವದು – ಮಂಕುತಿಮ್ಮ|| 511 ||
ಆವ ಋಣಕೋಸುಗವೊ, ಆರ ಹಿತಕೋಸುಗವೊ ಅವಾವ ಕಾರಣಕೊ, ಆವ ಯೋಜನೆಗೋ ನೋವ ನೀಂ ಪಡುವುದೇ ದೈವೇಚ್ಚೆಯಾಗಿರದೆ? ದೈವಕುರುಡೆನ್ನದಿರು – ಮಂಕುತಿಮ್ಮ|| 512 ||
ಆವುದರಿನಾವಾಗ ದೈವ ತಾನೊಲಿದೀತೊ ಪೂರ್ವಿಕದ ನಿಯತಿಯನದೆಂದು ಸಡಲಿಪುದೋ ಭಾವಿಸುಕೃತವದೆಂದು ಪೂರ್ವದುರಿತಕೆ ಮಿಗಿಲೋ? ದೈವಿಕರಹಸ್ಯವದು – ಮಂಕುತಿಮ್ಮ|| 513 ||
