ಶೀರ್ಷಿಕೆ – ಬ್ರಹ್ಮ ಸಂಸಾರಿ
ಸುಂದರವನೆಸಗು ಜೀವನದ ಸಾಹಸದಿಂದೆ ಕುಂದಿಲ್ಲವದಕೆ ಸಾಹಸಭಂಗದಿಂದೆ ಮುಂದಕದು ಸಾಗುವುದು ಮರಳಿ ಸಾಹಸದಿಂದೆ ಚೆಂದ ಧೀರೋಧ್ಯಮವೆ – ಮಂಕುತಿಮ್ಮ|| 269 ||
ಎಲ್ಲರಿಗಮಾಗಿ ತಾನ್, ಎಲ್ಲರುಂ ತನಗಾಗಿ ನಿಲ್ಲುವೇಕಾತ್ಮತೆಯ ಬಾಳ್ವೆಯಿಂ ಕಲಿಯಲ್ ಸಲ್ಲುವುಪಕರಣಗಳು ಮನೆ ರಾಜ್ಯ ಸಂಸಾರ- ವಲ್ಲಗಳೆಯದಿರವನು – ಮಂಕುತಿಮ್ಮ|| 270 ||
ವ್ಯರ್ಥವೀ ಜೀವನದ ಬಡಿದಾಟವೆನ್ನದಿರು ಅರ್ಥವಹುದು ನಿನಗೆ ಪೂರ್ಣದರ್ಶನದಿಂ ನರ್ತಿಪನು ಜಡಜೀವರೂಪಂಗಳಲಿ ಬೊಮ್ಮ ಪೂರ್ತಿಯಿದನರಿಯೆ ಸೊಗ – ಮಂಕುತಿಮ್ಮ|| 271 ||
ಬೊಮ್ಮನೇ ಸಂಸೃತಿಯ ಕಟ್ಟಿಕೊಂಡುತ್ಸಹಿಸೆ ಸುಮ್ಮನರೆಚಣವಿರದೆ ಪ್ರಕೃತಿ ತೊಡಗುತಿರೆ ಜನ್ಮ ಸಾಕೆನುವುದೇಂ? ದುಮ್ಮಾನಪಡುವುದೇಂ ಚಿಮ್ಮುಲ್ಲಸವ ಧರೆಗೆ- ಮಂಕುತಿಮ್ಮ|| 272 ||
ಕೋಟಿ ಕೋಟಿ ದೆಸೆಯುಸಿರು, ಕೋಟಿ ರಸದಾವಿಗಳು ಕೋಟಿ ಹೃದಯದ ಹೋಹೋ ಹಾಹಾಕಾರಗಳು ಕೂಟ ಕೂಡಿಹುವಂತರಿಕ್ಷದಲಿ ನೀನದರಿನ್ ಓಟ ಓಡುವುದೆತ್ತ ? ಮಂಕುತಿಮ್ಮ|| 273 ||
