ಶೀರ್ಷಿಕೆ – ಮನವ ತೊರೆದಿರಲಹುದೇ?
ಏಕವಾಗವೆ ದೈವ ಚಿತ್ತ ನರಚಿತ್ತಗಳು ಏಕೆನ್ನ ಮನವನಾಳನು ಲೋಕದೊಡೆಯಂ ಬೇಕೆನಿಪುದೊಂದೆನಗೆ ವಿಧಿ ಗೈವುದಿನ್ನೊಂದು ಈ ಕುಟಿಲಕೇಂ ಮದ್ದು – ಮಂಕುತಿಮ್ಮ|| 369 ||
ಸ್ವಾತಿ ಮಳೆಹನಿ ಬೀಳ್ವ, ಶುಕ್ತಿ ಬಾಯ್ದೆರೆದೇಳ್ವ ಕೌತುಕದ ಸಮಯಯೋಗದೆ ಮೌಕ್ತಿಕಫಲ ಪ್ರೀತಿ ಸುಖ ಸತ್ಯದರ್ಶನ ಶಾಂತಿಗಳ ಹುಟ್ಟುಮ್ ಆ ತೆರದೆ ಯೋಗದಿನೆ – ಮಂಕುತಿಮ್ಮ|| 370 ||
ಬೇಕು ಬೇಕದು ಬೇಕು ಬೇಕಿದೆನಗಿನ್ನೊಂದು ಬೇಕುನುತ ಬೊಬ್ಬಿಡುತಲಿಹ ಘಟವನಿದನು ಏಕೆಂದು ರಚಿಸಿದನೊ ಬೊಮ್ಮನೀ ಬೇಕು ಜಪ ಸಾಕೆನಿಪುದೆಂದಿಗೆಲೊ – ಮಂಕುತಿಮ್ಮ|| 371 ||
ವನದಿ ನಿರ್ಜನದಿ ಮೌನದಿ ತಪವನೆಸಗುವನ ನೆನಪಿನಲ್ಲಿ ಪಿಂತಿನನುಭವವುಳಿಯದೇನು ಇನಿನೋಟ ಸವಿಯೂಟ ಕಿನಿಸು ಕರುಬುಗಳಾಟ ಕನಲುತಿಹುವಾಳದಲಿ – ಮಂಕುತಿಮ್ಮ॥ 372 ||
ಮನೆಯ ತೊರೆದೋಡಲೇಂ? ವನಗುಹೆಯ ಸಾರಲೇಂ? ತನುವನುಗ್ರವ್ರತಗಳಿಂದೆ ದಂಡಿಸಲೇಂ? ಬಿನದಿಗಳನರಸಿ ನೀನೂರೂರೊಳಲೆದೊಡೇಂ? ಮನವ ತೊರೆದಿರಲಹುದೆ – ಮಂಕುತಿಮ್ಮ॥ 373 ||
