ಶೀರ್ಷಿಕೆ – ತಿಳಿದು ಹಳಿಯುವೊಡೆ ಹಳಿ
ಯಮನಿಗೇಕಪಕೀರ್ತಿ? ನರರು ಬಲು ಕರುಣಿಗಳೇ? ಮಮತೆಯಿನೊ ರೋಷದಿನೊ ಹಾಸ್ಯದಿನೊ ನಿಮಿಷನಿಮಿಷಮುಮೊರ್ವನಿನ್ನೊರ್ವನನು ತಿಕ್ಕಿ ಸಮೆಯಿಸುವನಾಯುವನು – ಮಂಕುತಿಮ್ಮ|| 279 ||
ದೋಷಿಯವನಿವನು ಪಾಪಿಯನುತ್ತ ಗಳಹದಿರು ಆಶೆಯೆನಿತವನು ಸಹಿಸಿದನೊ,ದಹಿಸಿದನೊ ವಾಸನೆಗಳವನನೇನೆಳೆದವೋ ಬಲವೇನೊ ಪಾಶಬದ್ಧನು ನರನು – ಮಂಕುತಿಮ್ಮ|| 280 ||
ಪಾತಕಿಯೊಳಾಗ್ರಹವ ತೋರೆ ನಿರ್ಮಲನಾರು? ಆತುಮದ ಪರಿಕಥೆಯನರಿತವರೆ ನಾವು? ಸೋತ ದುರ್ಬಲಿಗೆ ಸಲ್ಲುವುದು ನಮ್ಮನುಕಂಪೆ ನೀತಿ ನಿಂದೆಯೊಳಿರದು – ಮಂಕುತಿಮ್ಮ|| 281 ||
ಪಾಪವೆಂಬುದದೇನು ಸುಲಭಸಾಧನೆಯಲ್ಲ ತಾಪದಿಂ ಬೇಯದವನ್ ಅದನೆಸಪನಲ್ಲ ವಾಪಿಯಾಳವ ದಡದಿ ನಿಂತಾತನರಿವನೇಂ? ಪಾಪಿಯೆದೆಯೊಳಕಿಳಿಯೋ – ಮಂಕುತಿಮ್ಮ|| 282 ||
ರಾವಣನ ಹಳಿವವನೆ, ಜೀವವನೆ ಬಿಸುಡಿಸುವ ಲಾವಣ್ಯವೆಂತಹುದೋ? ನೋವದೆಂತಹುದೋ? ಬೇವಸವ ಪಟ್ಟು ತಿಳಿ, ತಿಳಿದು ಹಳಿಯುವೊಡೆ ಹಳಿ ಗಾವಿಲನ ಗಳಹೇನು? – ಮಂಕುತಿಮ್ಮ|| 283 ||
